Le prime edizion, intal 2004, e previodeve le partecipazion al concors di poesie no edite in lenghe taliane o slovene, ancje intes versions di dialet tipichis dal puest, par laudâ le jentrade de Slovenie inte Union Europeane. Daspò intai agns, in onôr a ducj i paisans che intal timp e son las atôr pal mont e che ancje lontan e àn metût insiemit gruessis e ferbints comunitâts, le manifestazion e je stade dedicade ae lenghe francese tal 2005, ae lenghe inglese tal 2006 e tal 2007 e al todesc tal 2008. Pe edizion dal 2009 le lenghe ametude a concors, dongje dal Talian e dal Sloven, e je il Furlan, une lenghe in plui che tancj cjanalots e àn imparât e scomençât a doprâ cun familiaritât tai incuintris tal teritori vicinant. Come che al è ormai custum dal concors, oltri di fâ coragjo aes tantis personis adultis che àn plasè di fâ fevelâ i lôr sintiments e lis lôr sensazions zontraviers dai vêrs de poesie, esprimintsi intune des lenghis ametudis, particolâr risalt al è dât ae partecipazion dai arlêfs de scuele primarie e secondarie di prin grât, che si à riservade par lôr une sezion. Al concors e son stadis presentadis fintore scuasit 1200 componiments: cetancj poetis inte sezion adults e àn proponût lis lôr oparis in dutis lis edizions, invezit inte sezion mularie e àn partecipât bielzà une cuarantine di scuelis des Valadis dal Natison e de regjon Friûl Vignesie Julie, ma ancje di altris regjons talianis e forestis. Il Comun di Pulfar e il comitât organizadôr e ringraziin di cumò ducj i partecipants, sedi chei solits che chei gnûfs e ancje i insegnants che e àn dât la lôr preseose colaborazion par slargjà l'amôr pe poesie framieç dai lôr arlêfs. Par l'an 2009 il teme che al ven proponût al è: “ musiche e je...” |
|
